#أحرار25| عبداللطيف نصار – نائب رئيس تحرير الأهرام – يروي عبر فيس بوك انتهاكات في سجون الانقلاب
يحدث في أقسام الشرطة الآن |
ليلة امس كنت استعد للنوم فجاءتني مكالمة تليفونية من صديق يطلب مني الذهاب اليه في احد اقسام شرطة جنوب القاهرة-وهتعرفوا لية ماذكرتش اسمه،ارتديت جاكت جينز فوق ملابس البيت اعتقادا اني سأنقله بسيارتي الي بيته والسلام،وصلت ولم اجده امام القسم،فدخلت بملابس البيت وفوقها الجاكيت الجينز برضة الي داخل القسم،استقبلني الضباط والصف بامتعاض وقال احدهم: نعم عاوز اية في الليلة دي،رديت بهدوووووووء ولاحاجة انا بسأل عن فلان،قال لي آة اللي راسه مفتوحة،اهو جوة الحجز،قلت راسه مفتوحة وجوة الحجز ازاي،قال عشان واحد جه واتهمه انه كان بيتهجم عليه فضربه،قلت والتاني فيه حاجة،قال لأة،بس هما الاتنين في الحجز للعرض علي النيابة الصبح،قلت وراسه اتعالجت،قال لأة،قلت لية مش المفروض يروح مستشفي يتعالج وبعدين يجيب تقرير طبي وبعدين يتعرض علي النيابة،قال النيابة تبقي تعمل اللي هي عاوزاه،قلت له ممكن اشوفه،وبعد محايلة وافق،فوجدت صديقي غرقان في دمه وراسه لسة بتنزف،قلت للضابط ماينفعش كدة لازم يتعالج،قال انا عارف شغلي،قلت ولو حصل له حاجة قال مفيش حاجة تدينني،وبعد مجادلات عقيمة لمدة ساعتين،اتلم عليا 4 ضباط،وقالوا يااستاذ روح احسن لك وبكرة قابله في النيابة،اصابني الذهول واخترت احدهم متوسما فيه الخير وامسكته من يده وسحبته علي جنب وسط اندهاش وتلمظ واستعداد الاخرين للانقضاض عليا وحبسي ان امكن،وقلت له: انا واقف من بدري وسامعكم وشايفكم وانتم بتضربوا المقبوض عليهم وبتلفقوا للبعض تهم حشيش وبودرة واخوان،اي والله اخوان،وانا اقدر دلوقتي اكلم الوزير،عارف لية لاني نائب رئيس تحرير الأهرام،واستنيت انكم تعملوا الصح وانتم رافضين،اية رأيك،لم ينطق بكلمة وانسحب من أمامي ودخل غرفة الضباط وخرج مناديا علي اتنين من امناء الشرطة قائلا خدوا فلان من الحجز وجري علي مستشفي كذا لعلاجه واحضار تقرير طبي،وفي ثواني اخذنا صديقي وجري علي المستشفي،ليدخل صديقي العمليات وهات ياتنظيف جروح وازالة دماء وخد عندك اكتر من عشرين غرزة في الرأس نتيجة ضربة ساطور من اول الراس لاخرها،وتقرير طبي راحة اكتر من21 يوما نتيجة شروع في قتل،،،،بس خلاص،،،ولسة الشرطة بتهرتل وتبوظ السمعة الطيبة اللي استعادتها بعد 30 يونيو،تقدروا تقولوا لي لية بيرجعوا تاني لأسوأ ماكان فيهم،مع ثقتي ان ماحدث ربما يكون استثناء من بينهم واكيد مش كلهم ،،واديني اهو لسة راجع اغير هدومي واروح عالنيابة..صحيح ناس تخاف ماتختشيش،واللي اختشوا ماتوا، وياثورة ماتمت خدها الغراب وطار
#أحرار25| عبداللطيف نصار - نائب رئيس تحرير الأهرام - يروي عبر فيس بوك انتهاكات ف...
شبكة نبض اونلاين
www.nabdon.com
ليست هناك تعليقات:
إرسال تعليق