#أحرار25 #تحليلات| عبدالله زيدان: الإخوان .. مش هتقدر تفلفص منهم !!
جماعة الإخوان أصبحت زي الملح في الأكل موجود في كل بيت ، ومعاك من المهد إلى اللحد .. تعالى نشوف ..
أول ما ربنا يكرمك ويجيلك حتة عيل ، أول ما يتولد هتلاقي دكتور إخواني في المستشفى جاي يباركلك ومبتسم وفي إيده تمرة وبيقولك أذن في ودنه .
هتاخده تطعمه وتسميه هتلاقي الموظف إخواني بيقولك سميه عمار أو أنس .
يبدأ الواد يحبي وبيعيط بدون سبب هتجري تفتحله قناة طيور الجنة أو طيور بيبي أو كراميش أو كناري اللي بيملكها الإخوان علشان تسكته .
هتروح تقدمله في المدرسة هتلاقي المدرس بتاعه إخواني وعمال يحشي في دماغة .
هتروح تشتكي في مجلس الآباء هتلاقي المجلس كلهم إخوان لأنهم هما الوحيدين اللي بيحضروا هتتكسف تشتكي .
الواد يدخل اعدادي هتروح تقدمله في نادي عشان يلعب كراتية أو سباحة هتلاقي المدرب بتاعه إخوان ، وإدارة النادي إخوان .
يدخل ثانوي هتشتركله في الكشّافة هتلاقي اللي ماسكين الكشّافة إخوان وكل المعسكرات الصيفية اللي بينظمها إخوان .
فلح ودخل جامعة هتلاقي طلاب الإخوان مستقبلينه علشان يعرفوه فين شؤون الطلبة وفي مدرج دفعته .
وفي آخر السنة هتلاقيهم طابعين كراسة إمتحانات السنين اللي فاتت وجدول الإمتحانات .
فشل الواد وحبيت تعلمه صنعه هتلاقي الأسطى بتاعه إخوان وبيقفل الورشة أثناء الصلاة .
حب الواد يشتغل هتلاقي صاحب العمل إخوان .
هتيجي تجوزه هتلاقي الفرقة اللي بتغني في فرحه إخوان ولو عمل Dg هتلاقيها أغاني إخوان .
دخل في معركة الحياة وعليه أقساط وديون هيلاقي جمعية خيرية إخوانية هتساعده مادياً .
كبر في وظيفته ولقى ناس بتظلمه فهيجري علشان يقوّم محامي إخوان مش حرّاق في أتعابه .
مرض وكبر في السن مش هيقدر يتعالج في مستشفى خاصة وفي نفس الوقت المستشفيات الحكومية ملوثة ، فسيضطر انه يدخله مستشفى تابعة للإخوان .
مـــــــــات .. هيلاقي اتنين من شباب الإخوان جايين يغسلوه ببلاش ومعاهم كفن وخشبة ويصلوا عليه .
معندهوش مقابر ، هيخدوه ويدفنوه في مقابر صدقات الإخوان .
الخلاصة ..
الإخوان فصيل منخرط في أعماق المجتمع وأصبح هو والمجتمع كالتوأمين المتلاصقين صعب فصلهما عن بعض .
#أحرار25 #تحليلات| عبدالله زيدان: الإخوان .. مش هتقدر تفلفص منهم !!
جماعة الإخو...
شبكة نبض اونلاين
www.nabdon.com
ليست هناك تعليقات:
إرسال تعليق